mathau o faethu

Gall cyfleoedd gofal maeth tymor byr Maethu Cymru Caerffili fod yn ddiwrnod, yn fis, yn flwyddyn neu’n unrhyw beth yn y canol! Mae’n golygu bod y cynlluniau ar gyfer plentyn yn dal i gael eu hystyried, a’n bod ni’n dal i geisio gweld sut gallai’r dyfodol fod.

Fel gofalydd maeth tymor byr, rydyn ni’n eich helpu i fod yno i blentyn tra byddwn yn sicrhau’r ‘tymor hir’ (sydd weithiau’n cael ei alw’n sefydlogrwydd). Mae hyn yn golygu bod yn bresennol ac yn gefnogol pryd bynnag y mae arnyn nhw eich angen chi, a’u helpu wedyn i gymryd eu camau nesaf: at eu teulu, at deulu maeth arall neu i gael eu mabwysiadu.

I ni a’r plant rydyn ni’n gweithio gyda nhw, dim faint o amser sy’n penderfynu pa effaith rydych chi’n ei chael. Os oes gennych chi galon gynnes, meddwl agored a’r parodrwydd i rannu’r rhain â phlant maeth sydd angen hynny, bydd y manteision i chi a nhw’n amhrisiadwy.

Mae gofal maeth tymor hir yn cynrychioli cartref newydd gyda theulu gwahanol i’r plant hynny nad ydyn nhw’n gallu byw gartref. Mae’n newid mawr i fywyd unrhyw un, felly rydyn ni’n gwneud yn siŵr bod pob plentyn yn cadw mewn cysylltiad â’r gymuned a’r bobl maen nhw’n eu hadnabod orau – pan fydd hyn yn iawn iddyn nhw.

Mae gofal maeth tymor hir Caerffili yn golygu paru ystyrlon, gan gysylltu’r plentyn maeth iawn â’r rhiant maeth iawn am gyhyd ag y bydd eich angen chi arno. Mae’n ymwneud â darparu amgylchedd diogel, lle gall plant ddatblygu perthnasoedd newydd cadarnhaol a dysgu bod yn nhw eu hunain. I blentyn, mae’n golygu teulu maeth sefydlog am oes.

Weithiau mae angen seibiant ar bob un ohonon ni. Dyna yw nod seibiant byr – lle mae plant yn treulio rhywfaint o amser yn wahanol i’r arfer er mwyn cael profiadau newydd. 

Gall seibiant byr (sydd weithiau’n cael ei alw’n ‘ofal cymorth’) olygu gofalu am blentyn dros nos, yn ystod y dydd neu ar benwythnosau. Mae’n ymwneud â chynnig profiadau a chyfleoedd newydd mor rheolaidd neu afreolaidd ag sydd eu hangen ar y plentyn a’i deulu. Fel gofalydd seibiant byr, rydych chi’n rhan o’r teulu estynedig hwn ac yn rhoi cyfle i ysgrifennu pennod nesaf eu bywydau. Ac yn cael digon o hwyl ar hyd y ffordd, wrth gwrs!

Gyda lleoliadau rhiant a phlentyn, rydych chi’n rhannu eich profiad magu plant eich hun â rhywun sydd eisiau cynnig y cariad a’r gofal gorau posibl i’w blentyn ei hun. Efallai nad oes gan y rhiant y profiad sydd ei angen arno i wneud popeth ar ei ben ei hun, a dyna lle gallwch chi helpu. 

Rydych chi’n meithrin y genhedlaeth nesaf er mwyn i unigolion y genhedlaeth nesaf allu gwneud yr un peth. Mae hyn i gyd yn ymwneud ag arwain rhieni i wella, yn bersonol ac ar ran eu plentyn.

Darllenwch fwy: maethu rhiant a phlentyn yng nghaerffili

Wrth faethu plant yn ardal Caerffili, gallwch ddewis magu’r rheini sydd ag anghenion emosiynol neu ymddygiadol a allai fod yn fwy cymhleth. Anghenion sydd weithiau’n gofyn am fath gwahanol o ofal.

Dyna lle mae gofal therapiwtig yn gallu helpu. Mae gofalyddion maeth therapiwtig yn cael rhagor o gymorth, i wneud yn siŵr bod eu plant maeth yn cael popeth sydd ei angen arnyn nhw i ddysgu, llwyddo a mwynhau holl hwyl plentyndod llawn cariad.

Dyma clip byr o rai o’n gofalwyr maeth. Gael gwybod mwy: https://www.mysupportteam.org.uk/cy/maethu-therapiwtig/

Gallech helpu person ifanc 16-21 oed drwy ddarparu pont rhwng gofal a byw’n annibynnol. Byddech yn cefnogi’r person ifanc mewn ffordd debyg i letywr. Ni fyddech yn cael eich cofrestru fel gofalwr maeth a byddwch yn cael eich asesu’n wahanol.

Byddech yn cynnig ystafell wely sbâr iddo ond hefyd yn ei helpu i fynychu addysg a chwilio am swydd neu hyfforddiant a chyda sgiliau bywyd fel coginio a chyllidebu. Mae llety â chymorth yn ffordd wych o ddechrau gofalu am bobl ifanc, ochr yn ochr â’ch ymrwymiadau eraill.